TILA ipinaubaya na ng Malakanyang sa Justice Department ang magiging hakbang para manatili sa Pilipinas ang kontrobersiyal na si Pastor Apollo Quiboloy na kasalukuyang nasa FBI most wanted list dahil sa partisipasyon nito at ng dalawa pang opisyal ng Kingdom of Jesus Christ church sa di umano’y labor trafficking, sex trafficking, cash smuggling at iba pang krimen.

May ilang panawagan kasi sa Malakanyang na ipag-utos sa DoJ ang pagpapalabas ng Hold Departure Order (HDO) laban kay Quiboloy habang nakabinbin pa ang extradition request ng Estados Unidos.

Si Quiboloy, 71, lider ng Kingdom of Jesus Christ, ay inilagay sa FBI most wanted list para sa kanyang “his alleged participation in a labor trafficking scheme that brought church members to the United States, via fraudulently obtained visas, and forced the members to solicit donations for a bogus charity, donations that actually were used to finance church operations and the lavish lifestyles of its leaders”.

Kasama sina Teresita Dandan at Helan Panilag sa most wanted list dahil sa di umano’y pakikipagsabwatan kay Quiboloy.

Sinabi naman ni DOJ Sec. Menardo Guevarra na hangga’t walang nakikitang sapat na dahilan para baligtarin ang findings, wala namang batayan para i-apply ang precautionary hold departure order laban sa pastor.

Kaugnay nito, nilinaw ng US government na walang kaugnayan sa nalalapit na May 9, 2022 general election ang pagpapalabas ng FBI ng wanted poster laban kay Quiboloy.

“The FBI’s release of a wanted poster for Kingdom of Jesus Christ founder Pastor Apollo Quiboloy follows a multi-year effort by law enforcement. It is unrelated to the Philippines’ ongoing presidential election campaign,” ayon sa pahayag ng embahada ng US sa Maynila.

Hinihiling ng FBI sa sinomang nakakaalam sa kinaroroonan ni Quiboloy na ipagbigay-alam sa pinakamalapit na embahada ng Amerika o konsulado. (CHRISTIAN DALE/JESSE KABEL)